Kəmalə Alıyeva
Azərbaycanda fəaliyyət göstərən 26 bankdan 8-nin bu ilin I rübündə xüsusi ehtiyatlara ayırmaları ötən ilin eyni dövrü ilə müqayisədə çox olub. Bunlar “Turan Bank”, “Muğan Bank”, “Unibank”, “Kapital Bank”, “Zıraat Bank Azərbaycan”, “Azərbaycan Beynəlxalq Bankı” və “Xalq Bank” ASC-lər, eləcə də İran Milli Bankının Bakı filialıdır. Ən yüksək dinamika “Turan Bank”da (45,6 dəfə), ən aşağı dinamika isə “Xalq Bank”da (0,7%) qeydə alınıb.
5 bankın – “Günay Bank”, “Bank Avrasiya”, “Naxçıvan Bank” və “Rabitəbank” ASC-lərin, “Yapı Kredi Bank Azərbaycan” QSC-nin isə xüsusi ehtiyatlara ayırmaları azalıb. Ən çox azalma “Rabitəbank”da (75,5%), ən az azalma isə “Günay Bank”da (5,6%) qeydə alınıb.
3 bankın – “Bank of Baku”, “Bank VTB Azərbaycan” və “Express Bank” ASC-lərin xüsusi ehtiyatlara ayırmalar üzrə qənaəti müvafiq olaraq 5,1 dəfə, 2,1 dəfə və 58,8% artıb, 3 bankın – “Bank Respublika” və “Yelo Bank” ASC-lərin, Pakistan Milli Bankının Bakı filialının isə xüsusi ehtiyatlara ayırmalar üzrə qənaəti müvafiq olaraq 73%, 82,7% və 50% azalıb.
4 bank – “AFB Bank”, “Bank BTB” və “Premium Bank” ASC-lər, “Access Bank” QSC bu ilin yanvar-mart aylarında xüsusi ehtiyatlara vəsait ayırıb, ötən ilin eyni dövründə qənaət edib, 3 bank – “Azərbaycan Sənaye Bankı”, “Azər-Türk Bank” və “PAŞA Bank” ASC-lər isə bu ilin I rübündə xüsusi ehtiyatlar üzrə qənaət edib, ötən ilin eyni dövründə vəsait ayırıb. Odur ki, bu bankların xüsusi ehtiyatlar üzrə ayırmalarının / qənaətinin dinamikasını hesablamaq mümkün olmayıb.
9 bank xüsusi ehtiyatlara vəsait ayırmayıb
Azərbaycanda fəaliyyət göstərən 26 bankdan 9-u bu ilin I rübündə xüsusi ehtiyatlara vəsait ayırmayıb. Bunlar “Azər-Türk Bank”, “Bank Respublika”, “Azərbaycan Sənaye Bankı”, “Yelo Bank”, “Express Bank”, “Bank VTB Azərbaycan”, “Bank of Baku” və “PAŞA Bank” ASC-lər, eləcə də Pakistan Milli Bankının Bakı filialıdır.
Başqa sözlə, bu banklar xüsusi ehtiyatlara ayırmalar üzrə qənaət ediblər. Bu baxımdan ən yüksək göstərici “PAŞA Bank”da (7,374 milyon manat), ən aşağı göstərici isə Pakistan bankında (5 min manat) qeydə alınıb.
Qalan 17 bank isə müxtəlif məbləğlərdə ehtiyatlar yaradıb. Ayırmaların ən yüksək həddi “Kapital Bank” ASC-də (38,8 milyon manat), ən aşağı həddi isə İran Milli Bankının Bakı filialında (107 min manat) qeydə alınıb.
Mənbə – Renkinq