Mirəli Qasımov
İranın neft ixracı son iki ildə rekord səviyyəyə yüksələrək, keçən ay gündəlik 1,3 milyon bareli keçib.
Marja xəbər verir ki, bu barədə İranın iqtisadiyyat və maliyyə naziri Ehsan Xanduzi cümə axşamı Financial Times qəzetinə müsahibəsində bildirib.
Xanduzi həmçinin qeyd edib ki, ilin ilk 11 ayında (İran təqvimi martın 21-də başlayır) qeyri-neft ixracı 53 milyard dollara çatıb ki, bu da ötən ilin eyni dövrü ilə müqayisədə 12% çoxdur. Eyni müddət ərzində idxal 60 milyard dollar təşkil edib. Nazirin sözlərinə görə, ticarət ilə bağlı məlumatlar sübut edir ki, “İran təcrid oluna bilməz”.
Siyasətçi qeyd edib ki, İranın qeyri-neft gəlirlərinin artması həm də vergidən yayınma ilə mübarizənin gücləndirilməsi ilə bağlıdır.
Bundan əvvəl İranın Neft, Qaz və Neft-Kimya Məhsulları İxracatçıları Birliyinin rəsmi nümayəndəsi Həmid Hüseyni IRNA agentliyinə bildirib ki, İslam Respublikasının 2022-ci ilin mart-sentyabr aylarında neft ixracından əldə etdiyi gəlir 26 milyard dollar təşkil edib, bu ötən ilin göstəricilərindən 8 milyard dollar çoxdur. Hosseiny vurğulayıb ki, neft ixracının böyük hissəsi Çinə gedir.