Cənubi Koreyanın UNIST Universitetinin bir qrup tədqiqatçısı elektron cihazları doldurma üsulumuzu tamamilə dəyişdirə biləcək inqilabi texnologiya hazırlayıb.

İndex.az xəbər verir ki, yeni texnologiya sayəsində telefonunuzu cibinizdə saxlamaqla onu enerji ilə doldurmaq mümkün ola bilər. Elektrik rezonansı (ERWPT) əsaslı simsiz enerji ötürmə sistemi ilə yeni texnologiya elmi fantastika olmaqdan çıxacaq və reallığa çevriləcək.

Ənənəvi maqnit rezonans (MRWPT) texnologiyası ilə işləyən simsiz enerji doldurma sistemlərindən fərqli olaraq, bu yeni sistem elektrik yüklərinin monopol xüsusiyyətlərindən istifadə edir. Bu yanaşma ilə cihazların dəqiq uyğunlaşdırılmasını tələb edən köhnə sistemlərin ən böyük maneəsi aradan qaldırılır.

Sistem 2 metr məsafədə 46% səmərəliliklə 50 vata qədər enerji ötürə bilir. Yəni, 2007-ci ildə eyni məsafədə MIT tədqiqatçılarının əldə etdiyi 40% səmərəliliyi belə üstələyir. Üstəlik, sistem alıcının yerindən asılı olmayaraq daimi səmərəlilik təklif edə bilər. Beləliklə, cihazlarınız otaqda gəzərkən belə şarj edə bilər.

Smartfonları bir kənara qoysaq, bu texnologiya şəxsi qurğular, eləcə də ağıllı fabriklərdə logistik robotlar və avtomatlaşdırma sistemləri üçün inqilabi xarakter daşıyır. Birdən çox cihazı eyni anda doldurmaq qabiliyyəti sayəsində həm evdə, həm də iş mühitində böyük rahatlıq təmin edə bilər.