İslandiyada qatar şəbəkəsinin olmamasının birinci səbəbi coğrafiyanın özüdür.

İndex.az xəbər verir ki, İslandiyada dəmir yollarının olmamasının birinci səbəbi vulkanik fəaliyyət baxımından dünyanın ən aktiv yerlərindən biri olmasıdır. Ölkə ərazisinin böyük hissəsi qayalarla, lava sahələri və buzlaqlarla örtüldüyünə görə işlər çətinləşir.

Bu şəraitdə dəmir yollarının tikintisi kifayət qədər çətin və baha başa gəlir. Üstəlik, xətlərin daimi texniki xidmətə ehtiyacı olması qatarları səmərəli nəqliyyat vasitəsi etmir.

İslandiyanın ərazisi 103 min km² olsa da, əhalisi 393 min nəfərdir. Əhalinin böyük hissəsi paytaxt Reykyavik və onun ətrafında cəmləşib.

Ona görə də ölkənin digər bölgələrinə çəkiləcək dəmir yolu xəttinin kifayət qədər sərnişin tutumuna çatması və xərclərini ödəməsi çətindir. İslandiyada dəmir yollarının tikintisinin dəyəri çox yüksəkdir və bu xətlərdən geri dönüş olduqca məhdud olardı.

Şəhərlərarası avtobus xidmətləri ilə ölkənin istənilən yerinə gedə bilərsiniz. Bundan əlavə, İslandiyada yollar son dərəcə inkişaf edib.

Bundan əlavə, şəhərdaxili və yaxın məsafələrə daşımalarda velosipeddən istifadə də yüksək səviyyədə təşviq edilir. Beləliklə, İslandiyanın ekoloji cəhətdən təmiz strukturu, hətta dəmiryolları olmadan da daşımaların davamlı şəkildə təşkilinə töhfə verir.

Təbii ki, bir müddət dəmir yolu sisteminin yenidən qurulub-qurulmayacağı gündəmdə idi. Xüsusilə turistlərin sayının artması və Reykyavik ilə hava limanı arasında sürətli əlaqənin faydalı olacağı fikri qısa məsafəli dəmir yolu xəttini gündəmə gətirib.

Lakin yüksək xərclər və ətraf mühitə təsirlər bu layihəni hələlik dayandırır. Bəlkə bir gün İslandiyada məhdud bir dəmir yolu xətti görə bilərik, lakin ölkənin təbii quruluşunu nəzərə alsaq, bu, uzun müddət üçün uzaq bir imkan kimi görünür.