Bu prospektdə hərəkət məhdudiyyəti aradan qaldırılıb

Bakının 8 Noyabr prospektində aparılan asfaltlanma işləri artıq yekunlaşıb.

İndex.az bu barədə Azərbaycan Avtomobil Yolları Dövlət Agentliyinə istinadən xəbər verir.

Belə ki, prospektin şəhər mərkəzi istiqamətində Xəqani Rüstəmov küçəsinədək yolun hərəkət hissəsində aparılan əsaslı təmir işləri başa çatıb.

Bununla əlaqədar olaraq bu gün günorta saatlarından sözügedən hissə ilə avtonəqliyyat vasitələrinin hərəkəti üçün qoyulmuş məhdudiyyət aradan qaldırılıb və prospektlə rahat və fasiləsiz gediş-gəliş təmin olunub.

Hazırda prospekt boyunca ümumi hərəkətə maneə yaradılmadan piyada səkilərinin, velosiped zolağının və bufer zonanın, həmçinin yol ayrıcının tikintisi istiqamətinə işlər davam etdirilir.

Xatırladaq ki, 8 Noyabr prospektinin yenidən qurulması layihəsinə əsasən aparılan əsaslı təmir işləri çərçivəsində nəqliyyat vasitələrinin sürətli və maneəsiz hərəkətini təmin etmək, eləcə də yolun fasiləsiz olaraq yüksək hərəkətli buraxma qabiliyyətinin təmin edilməsi məqsədilə 8 zolaqlı (4 gediş, 4 gəliş) hərəkət hissəsinin, velosiped zolağının, bufer zonasının və səkilərin tikintisi işləri yerinə yetirilir.