Kəmalə Alıyeva
Yaponiyada göyərtəsində 6 nəfərin olduğu təcili yardım helikopterinin dənizə düşdüyü bildirilib.
İndex.az xəbər verir ki, Yaponiya Sahil Mühafizə Qüvvələrindən əldə edilən məlumata görə, təcili yardım helikopteri Naqasaki əyalətindəki Tsuşima adasından Fukuoka əyalətindəki xəstəxanaya qalxdıqdan təxminən 10 dəqiqə sonra saat 13.43 radələrində əlaqə kəsilib.
Xəbərdarlıq üzərinə kruiz marşrutunda axtarış əməliyyatı başlanarkən, helikopter dəniz səthində tərs vəziyyətdə tapılıb.
Helikopterdə olan 6 nəfərdən 3-nün hadisə yerindən sağ-salamat xilas edildiyi açıqlanıb. Bildirilib ki, 86 yaşlı qadın xəstə, 68 yaşlı oğlu və onu müşayiət edən 34 yaşlı kişi həkim dünyasını dəyişib.
Dənizdə helikopterə ciddi ziyan dəymədiyi üçün pilotun qəzadan əvvəl təcili eniş etməyə cəhd etdiyi qiymətləndirilib və hadisə ilə bağlı ətraflı araşdırma başlanıb.