![Neft-qaz sektorundan büdcə daxilolmaları 32% artıb](https://index.az/wp-content/uploads/2023/06/Rusiya-nefti.jpg)
Bu ilin I yarısında Azərbaycanın dövlət büdcəsinin neft-qaz sektoru üzrə daxilolmaları 8 797,7 milyon manat təşkil edib ki, bu da proqnozdan 3,8 %, ötən ilin eyni dövrü ilə müqayisədə isə 32,3 % çoxdur.
İndex.az bu barədə Maliyyə Nazirliyinə istinadən xəbər verir.
Məlumata görə, hesabat dövründə büdcə daxilolmalarında neft-qaz sektorunun payı 46,7 % təşkil edib.
6 ayda dövlət büdcəsinin gəlirlərində neft-qaz sektoru üzrə daxilolmaların 27,4 %-i və yaxud 2 milyard 407,2 milyon manatı vergi orqanlarının xətti ilə daxilolmaların, 72,6 %-i və yaxud 6 milyard 390,5 milyon manatı Dövlət Neft Fondundan dövlət büdcəsinə transfertin payına düşüb.
Vergi orqanlarının xətti ilə dövlət büdcəsinə mədaxil olmuş neft-qaz gəlirlərinin 48,5 %-i və yaxud 1 milyard 167 milyon manatı “Şahdəniz” yatağı üzrə mənfəət vergisi, 34,6 %-i və yaxud 833,3 milyon manatı Dövlət Neft Şirkətinin ödədiyi müvafiq vergilər, 16,9 %-i və yaxud 406,9 milyon manatı Azərbaycan Beynəlxalq Əməliyyat Şirkətinin mənfəət vergisi təşkil edir.