Index
Bu ilin yanvar-mart aylarında Heydər Əliyev Beynəlxalq Aeroportunda sərnişin axını əhəmiyyətli dərəcədə artıb.
İndex.az Heydər Əliyev Beynəlxalq Aeroportuna istinadən xəbər verir ki, bu dövrdə hava limanı 1,464 milyondan çox sərnişinə xidmət göstərib. Bu da 2023-cü ilin müvafiq dövrü ilə müqayisədə 38,2% çoxdur. Bu rəqəm həmin müddət ərzində 1,058 milyon təşkil edib.
Hesabat dövründə 39 aviaşirkət, onlardan 15-i aşağıbüdcəli (loukoster) olmaqla, 12,378 min reys yerinə yetirilib. Beynəlxalq marşrutlarda 2023-cü ilin yanvar-mart ayları ilə müqayisədə 43,5% çox – 1,319 milyon sərnişin daşınıb. 656 min sərnişinə xarici aviaşirkətlər, 662 min sərnişinə isə milli aviadaşıyıcı xidmət göstərib. İlin əvvəlindən Naxçıvan istiqamətində 144 mindən çox sərnişin daşınıb.
Sərnişinlər arasında ən populyar beynəlxalq istiqamətlər isə İstanbul, Abu Dabi, Tbilisi, Dubay və Moskva şəhərləri olub. Mühüm nailiyyətlərdən biri də 2024-cü ilin ilk 3 ayında Bakı hava limanında tranzit sərnişinlərin sayının artmasıdır. Ötən illə müqayisədə tranzit sərnişinlərin sayı 82,7% artaraq 72 min nəfərdən çox olub.