İlkin Əhmədov
Azərbaycanın aparıcı banklarından olan “ASB Bank”ın 2-ci rübün sonuna olan maliyyə vəziyyəti açıqlanıb.
İndex.az xəbər verir ki, 2022-ci ilin ilk yarısında bankın faiz gəlirləri 15.5% azalaraq ötənilki 14.4 milyon manatdan 12.1 milyon manata enib.
Bankın kreditlərdən əldə etdiyi faiz gəlirləri 18% azalaraq 6.7 milyon manata, başqa banklardakı depozitlərdən əldə etdiyi gəlirlər isə 12% azalaraq 5.4 milyon manata enib.
İlk yarımillikdə “ASB Bank”ın faiz xərcləri də 2.7 milyon manat və ya 34% azalaraq 5.3 milyon manata enib. Faiz xərclərinin azalmasının səbəbi bankdakı depozitlər üzrə ödənilən faizlərin həcminin azalması ilə bağlıdır. Ötən ilin eyni dövründə 6.88 milyon manat olan faiz ödənişləri bu il 42% azalaraq 3.99 milyon manata enib. Nəticədə ilk yarım ilin sonunda bankın xalis faiz 6.8 milyon manat olub.
Bu dövrdə bankın qeyri-faiz gəlirləri 1.3 milyon manat artaraq 4.3 milyon manata yüksəlib. Bankın komissiya gəlirləri 1 milyon manat artaraq 1.6 milyon manata çatıb.
Bankın qeyri-faiz xəcləri isə təqribən 9% artaraq 8.1 milyon manat olub.
Hesabat dövründə “ASB Bank”da əməkhaqqı xərcləri 140 min manat və ya 6% azalaraq 2.24 milyon manata enib. Nəticədə bankın əməliyyat mənfəəti 57% artaraq 2.9 milyon manata yüksəlib.
Bank mümkün zərərlər üzrə ayırdığı ehtiyatların 816 min manatını geri çəkib, eyni zamanda 760 min manat vergi ödəyib. Nəticədə 2-ci rübün sonuna xalis mənfəət 3 milyon manatı keçib. Bu, əvvəlki illə müqayisədə təqribən 3 dəfə artıqdır.
2022-ci ilin ilk yarım ilinin nəticələrinə görə, “ASB Bank” kiçilib. Bankın aktivləri 74 milyon manat və ya 9% azalaraq ilin əvvəlindəki 812 milyon manatdan 738 milyon manata düşüb. Qeyd edək ki, “ASB Bank”da aktivlərin azalması ötən ildən davam edir. Belə ki, 2021-ci ilin ilk yarısında bankın aktivləri 864 milyon manat idi.
Bu dövrdə bankın digər banklardakı depozitləri 82 mlyon manat azalaraq 467 milyon manatdan 385 milyon manata enib. Bankın xalis kredit portfeli isə 250 milyon manat təşkil edib.
İlk yarım ildə bankın öhdəlikləri də 77 milyon manat azalaraq 707 milyondan 630 milyon manata enib. Azalmanın səbəbi bankdakı depozitlərin həcminin 58 milyon manat və ya 11% azalmasıdır.
Əvəzində bankın cəmi kapitalı 2.5 milyon manat artaraq 105.5 milyon manatdan 108 milyon manata yüksəlib.
FED.az