Keçmiş nazir: “Bahalı AZAL biletləri ilə uçmağa məcburuq”

“Qəribə bir durumdayıq, ölkədə sanki bütün səviyyələrdən olan vəzifə və imkan sahibləri insanlara acı yaşatmaq, haqlarını tapdalamaq, mümkün olan və olmayan üsullarla onların son qəpiklərini əllərindən almaq üçün yarışa giriblər”.

Index.az xəbər verir ki, bunu keçmiş maliyyə naziri Fikrət Yusifov bildirib.

“Facebook” səhifəsində açıqlamanı yayan sabiq nazir bildirib ki, məmur özbaşınalığı baş alıb gedir, biznesmen məmur və deputatların yaratdıqları monopoliya ölkə həyatını iflic edib: “Koronavirus bizdən əl çəkib, biz ondan qurtula bilmirik, quru sərhədləri nədən açmırıq? Bu sərhədlərin bağlı saxlanılmasının bizə verdiyi nədir? İnsanlar qonşu ölkələrə quru yolla deyil, yalnız AZAL-ın reallıqdan uzaq, qonşu ölkələrlə müqaisədə 4-5 dəfə baha biletləri ilə uçmağa məcbur qalırlar. Deməli, daha çox maddi itkilərlə üzləşirlər”.

Yusifov əlavə edib ki, Gürcüstana, İrana, Rusiyaya quru yolla gedən sadə vətəndaş oradan ailəsi üçün daha ucuz və keyfiyyətli ərzaq, dərman və s. alıb gətirə bilirsə və ya bu ölkələrdə daha ucuz və keyfiyyətli tibbi xidmət əldə edirsə, bunun nəyi pisdir? “Mövcud monopoliya öz işini “ustalıqla” görür. İnsanlar qonşu ölkələrə az xərclə quru yolla deyil, bahalı AZAL biletləri ilə uçmalıdırlar, yerli marketlərdən və apteklərdən baha və keyfiyyətsiz məhsullar almağa məcbur qalmalıdırlar. Bir sözlə, mümkün qədər pis yaşamalıdırlar. Bu gün cəmiyyətdə buna bənzər eybəcərliklərin sayı-hesabı yoxdur. Meyvə-tərəvəz ölkəsi olan vətənimizdə mövsümü meyvələrin qiymətləri od tutub yanır. Marketlərdə və bazarlarda insanları hər vəchlə həm çəkidə və həm də qiymətdə aldadırlar. Yanacaqqoldurma məntəqələrində sənin avtomobilin üçün aldığın yanacağın 10%-ni açıq aşkar oğurlayırlar daha hansını deyəsən… Görəsən bu ac və talançı məmurların gözləri nə vaxt doyacaq?” – o qeyd edib.