“Tesla”nın Fransada satışları martda ardıcıl 3-cü ay düşdü

Fransada mart ayında ABŞ istehsalı olan “Tesla” elektromobillərindən 3157 ədəd qeydiyyata alınıb.

İndex.az xarici mətbuata istinadən xəbər verir ki, bu barədə yerli sənaye assosiasiyası olan “La Plateforme Automobile” bildirib.

Məlumata görə, bu, ötən ilin eyni dövrü ilə müqayisədə 36,8% azdır,

Birinci rübdə 6,69 min “Tesla” elektromobili satılıb ki, bu da 2024-cü ilin eyni dövrü ilə müqayisədə 41,1% azdır. Satışların azalması hər üç ayda qeydə alınıb.

Fransada martda bütün mühərrik tipləri olan avtomobillərin satışları 14,5% azalaraq 153,84 min təşkil edib, yanvar-mart aylarında isə 7,8% azalaraq 410 085 ədəd olub.

Bununla yanaşı, ölkədə elektromobillərin satışı birinci rübdə 18,2% artaraq 74,52 min təşkil edib.