![Şimali Koreyanın qlobal casusluq şəbəkəsi üzə çıxdı](https://index.az/wp-content/uploads/2024/07/kore2reuters431648194760jpg-WNsfamgc7EqmQIMy4R1UqA.jpg)
Şimali Koreyalı hakerlərin ölkənin nüvə silahı proqramını dəstəkləmək üçün digər ölkələrdən məxfi hərbi sirləri oğurlamaq üçün qlobal kibercasusluq kampaniyası apardıqları bildirilir.
İndex.az xəbər verir ki, ABŞ, Böyük Britaniya və Cənubi Koreya dünən yayımlanan birgə bəyanatda qeyd ediblər ki, Şimali Koreya kiber hakerlər tank, sualtı qayıq, donanma gəmiləri, döyüş təyyarələri, raketlər və radar istehsalçıları da daxil olmaqla geniş spektrli müdafiə və mühəndislik şirkətlərinin kompüter sistemlərini hədəfə alıblar.
Anadriel və ya APT45 adlı hakerlərin 2015-ci ildə ABŞ tərəfindən sanksiyaya məruz qalan Şimali Koreyanın Ümumi Kəşfiyyat Bürosu kimi tanınan kəşfiyyat agentliyinin bir hissəsi olduğu güman edilir.
FTB və ABŞ Ədliyyə Departamenti rəsmiləri Amerika Milli Aeronavtika və Kosmik Tədqiqatlar İdarəsi (NASA) və ölkədəki bəzi hərbi bazaların Şimali Koreyanın hakerlik fəaliyyətlərindən təsirləndiyini bildiriblər. 2022-ci ilin fevralında NASA-nı hədəf alan hakerlər çoxlu sayda məxfi məlumatları sızdıra biliblər.
Şimali Koreya uzun müddətdir ki, digər ölkələrə məxsus məxfi hərbi məlumatları oğurlamaq üçün haker qrupları ilə işləyir. ABŞ rəsmilərinin sözlərinə görə, hakerlər həmçinin ABŞ xəstəxanalarını və səhiyyə şirkətlərini öz əməliyyatlarını maliyyələşdirmək üçün “ransomware” proqramından istifadə edirlər.