ABŞ-ın “Tesla” şirkəti Texasda robotaksi xidmətinin fəaliyyəti üçün lisenziya alıb.

Bu barədə İndex.az “Bloomberg” nəşrinə istinadən bildirir.

Məlumata görə, belə bir lisenziyanın alınması, sentyabrın 1-dən qüvvəyə minən və robotaksi xidmətlərinə adi sürücülərin sərnişinlərə xidmət göstərdiyi servislərlə eyni qaydada tətbiq olunan ştatın yeni qanunu çərçivəsində zəruridir.

Yeni qanun sürücüsüz avtomobil operatorları üçün əlavə tələblər və nəzarət tədbirləri müəyyən edir. Hazırda belə nəqliyyat vasitələrinin sığortalanması, kameralarla təchiz edilməsi və yol hərəkəti qaydalarına riayət etmək qabiliyyətinə malik olması nəzərdə tutulur.

İyun ayında “Tesla” Texasın Ostin şəhərində məhdud rejimdə robotaksi xidmətini işə salıb.