"Volkswagen" Almaniyada "Polo", "Golf" və "T-Roc" kimi daxili yanma mühərrik modellərinin qiymətlərini 4,4% artırmağa qərar verib.

İndex.az xəbər verir ki, "Volkswagen"dən verilən açıqlamada bildirilib ki, inflyasiyanın artması səbəbindən "Golf", "Tiguan", "Passat", "Polo" və "T-Roc" kimi modellərin orta qiyməti 4,4% artacaq.

"Automobilwoche"nin xəbərinə görə, yeni qiymətlər fevralın 23-dən qüvvədə olacaq. Bu addımla "Volkswagen Polo"nun qiymətinin 905 avro və ya 4,5% artacağı bildirilir. Eynilə, "Golf"un qiyməti 1585 avro (5,36%), "T-Roc"un qiyməti isə 1455 avro (5,98%) artacaq.

Dilerlər isə "Volkswagen"in qiymətləri artırmaq qərarına mənfi reaksiya verdilər. Bir çox diler rəsmiləri deyir ki, alman şirkəti istehlakçıların qeyri-müəyyənliyi səbəbindən qiymətləri aşağı salmalıdır. Satışları azalmağa davam edən diler nümayəndələri də qiymət artımı qərarını gördükdə təəccübləndiklərini dilə gətiriblər.

Reaksiyalara baxmayaraq, avtomobil qiymətləri müxtəlif təsirlərə görə artmaqda davam edir. "Auto News Europe" xəbər verir ki, "Volkswagen" qiymətləri 2021-ci ildən 2022-ci ilin ortalarına qədər təxminən 11% artıb.