Kəmalə Alıyeva
Malayziyanın Korrupsiyaya Qarşı Mübarizə Komissiyası (MACC) 2023-cü ilin yanvarından 2024-cü ilin fevralına qədər qalmaqala səbəb olmuş dövlət fondu “1Malaysia Development Berhad” (1MDB) ilə bağlı 4,83 milyon dollardan çox aktivin geri alındığını elan edib.
İndex.az xəbər verir ki, Malayziyanın Korrupsiyaya Qarşı Mübarizə Komissiyası (MACC) 1MDB aktivlərinin bərpası üzrə işçi qrupu və xarici qurumlarla əməkdaşlıq edərək həm ölkə daxilində, həm də beynəlxalq səviyyədə 1MDB aktivlərini bərpa etdiyini bildirib.
“Bu vəsaitlər və aktivlər müxtəlif vasitələrlə, o cümlədən məhkəmə qərarları, həmçinin beş şəxsin könüllü təslim edilməsi ilə uğurla bərpa edilib və sonradan Malayziya hökumətinə qaytarılıb”, – komissiyanın bəyanatında deyilir.
Agentlik əlavə edib ki, 2019-cu ildən 2024-cü ilin fevralına qədər 1MDB aktivlərində cəmi 29,03 milyard ringgit (6 milyard dollar) bərpa edilib.
Malayziya və ABŞ müstəntiqləri iddia edirlər ki, 2009-2014-cü illər arasında 1MDB-nin yüksək səviyyəli rəhbərləri və əməkdaşları sözügedən fonddan öz şəxsi hesablarına 4,5 milyard dollar köçürüblər.
Malayziyanın keçmiş baş naziri Najib Razak 1MDB qalmaqalı ilə bağlı işdə təqsirli bilinərək 12 il həbs cəzasına məhkum edilib, lakin onun cəzası keçən həftə Malayziyanın əfv şurası tərəfindən yarıya endirilib.
Malayziya keçən ay bildirib ki, 1MDB qalmaqalı ilə əlaqəli xarici banklara qarşı hüquqi tədbirləri nəzərdən keçirir.