Ölkədə "Twitter" istifadəçilərinin fəallığı kəskin azalıb

Bu ilin avqust ayında Azərbaycanda "Facebook" istifadəçilərinin fəallığı iyul ayı ilə müqayisədə 33,4 faiz bəndi artıb.

İndex.az xəbər verir ki, "Global Stats" statistika mərkəzinin hesabatı əsasında aparılan hesablamalara görə, sentyabrın 1-nə "Facebook"un Azərbaycanın sosial media bazarında payı 72,5% təşkil edib ki, bu da ötən ilin müvafiq göstəricisindən 39,4 faiz bəndi çoxdur.

Populyarlığına görə "Facebook" ölkənin sosial media bazarında birinci yeri tutub.

Sosial şəbəkələr arasında populyarlığına görə ikinci yerdə "YouTube" qərarlaşıb ki, onun istifadəçilərinin ölkə üzrə fəallığı avqust ayı ərzində 1,2 faiz bəndi azalıb. Bu sosial şəbəkənin Azərbaycan bazarında payı bu ilin sentyabr ayının 1-nə 8,5% təşkil edib ki, bu da ötən ilin analoji göstəricisindən 7,1 faiz bəndi azdır.

Bu ilin avqust ayı ərzində ölkə üzrə "Pinterest" şəbəkəsinin istifadəçilərinin fəallığı 2,5 faiz bəndi azalıb. Sentyabrın 1-nə olan məlumata görə, "Pinterest" Azərbaycanın sosial media bazarında 8,2% bazar payı ilə 3-cü yerdə qərarlaşıb ki, bu göstərici ötən ilin müvafiq dövrü ilə müqayisədə 22,8 faiz bəndi azdır.

Qeyd edək ki, avqustda ölkə üzrə "Twitter" istifadəçilərin fəallığı kəskin azalıb. Belə ki, cari ilin iyul ayında Azərbaycanın media bazarında "Twitter" 29,2% bazar payı ilə ikinci yerdə qərarlaşmışdırsa, avqust ayında bu sosial şəbəkə istifadəçilərinin fəallığının 27,3 faiz bəndi azalması, onun ikinci yerdən beşinci yerə düşməsinə səbəb olub. Sentyabr ayının birinə olan məlumata görə, "Twitter"in Azərbaycanda bazar payı 1,88% təşkil edib.

Digər sosial şəbəkələrin pay bölgüsü belədir: "Instagram" – 4,26%, “Tumblr” – 2,99%, "Twitter" – 1,88%, "VKontakte" – 0,98% və s.

Bizi Facebook-da izləyin: INdexAzerbaijan