Image description

Bakı Şəhər İcra Hakimiyyəti paytaxt rayonlarının icra hakimiyyətlərinə ərazilərdəki restoranlarla bağlı tapşırıq verib. Belə ki, rayon icra hakimiyyətləri sahibkarlardan şadlıq saraylarının su çənlərində və digər sanitar sistemlərdə, zallarda təmizlənmə işinin aparılmasını tələb edib.

İndex.az xəbər verir ki, bu barədə Bakivaxti.az-a daxil olan məlumatda bildirilib.

Sahibkarlar hesab edirlər ki, bu xəbərdarlıq toy qadağasının ləğvi öncəsi hazırlıq işlərinin təşkili ilə əlaqəlidir. Belə ki, son günlər koronavirusa yoluxanların sayının azalması bir sıra qadağaların aradan qaldırılması məsələsini gündəmə gətirib. Deputatlar və eskpertlər cəmiyyəti maraqlandıran əsas məsələlərdən biri olan toylara qoyulan qadağaların aradan qaldırılması üçün hökumətə çağırış ediblər.

Şadlıq sarayları mövcud karantin rejiminin tələbləri çərçivəsində təmizliklə bağlı iməclik və dezinfeksiya tədbirləri keçirməyə başlayıblar. Su ehtiyat mərkəzlərinin təmizlənməsi və bununla bağlı meriyaya məlumatın verilməsi tələbi də bununla bağlıdır. Məlumatda o da bildirilir ki, yoluxma sayının azalma tempi bu şəkildə davam edərsə, iyun ayından toyların müəyyən edilmiş qaydalarla keçirilməsinə icazə verilə bilər.

Xatırladaq ki, Naxçıvan Muxtar Respublikasında toyların keçirilməsinə icazə verilib. Məlumata görə, şadlıq evlərinə qonaqların sayı 40 nəfəri keçməməklə toy məclislərini təşkil etmək icazəsi verilib. Elə bu gün bir toy məclisinin keçirildiyi bildirilir.

Qeyd edək ki, Azərbaycanda artıq bir ilə yaxındır ki, toyların keçirilməsinə icazə verilmir. Ölkə ərazisində xüsusi karantin rejiminin müddəti isə cari ilin iyunun 1-dək uzadılıb.

Bakivaxti.az