Image description

Azərbaycan Mərkəzi Bankından bu il lisenziya almış “Meqa Həyat Sığorta” və bazara ötən il daxil olmuş "Aqrar Sığorta Müştərək Sığorta Şirkəti" ASC-lər istisna olmaqla, ölkədə fəaliyyət göstərən 18 sığorta şirkətindən 4-nün ötənilki mənfəət vergisi ödəmələri əvvəlki illə müqayisədə az olub.

İndex.az xəbər verir ki, bunlar “PAŞA Sığorta”, “PAŞA Həyat Sığorta”, “Atəşgah Həyat Sığorta” və “Bakı Sığorta” ASC-lərdir.

Ən çox azalma “Bakı Sığorta”da (34,5%), ən az azalma isə “PAŞA Sığorta”da (4,7%) qeydə alınıb.

3 sığorta şirkəti – Dövlət Kommersiya Sığorta Şirkəti (“Azərsığorta”), eləcə də “Xalq Həyat Sığorta” və “Xalq Sığorta” ASC-lər həm ötən il, həm də əvvəlki il mənfəət vergisi ödəməyiblər. Odur ki, bu şirkətlərin vergi ödəmələrinin dinamikasını hesablamaq mümkün olmayıb.

Qalan 11 sığorta şirkətinin mənfəət vergisi ödəmələri isə artıb. Ən yüksək dinamika “Atasığorta” ASC-də (7,3 dəfə), ən aşağı dinamika isə “Günay Sığorta” ASC-də (8%) qeydə alınıb.

4 sığorta şirkətinin mənfəət vergisi ödəmələri 1 milyon manatdan çoxdur

Azərbaycan Mərkəzi Bankından bu il lisenziya almış “Meqa Həyat Sığorta” ASC istisna olmaqla, ölkədə fəaliyyət göstərən 19 sığorta şirkətindən 4-ü ötən il mənfəət vergisi ödəməyib.

Bu, bazara ötən il daxil olmuş "Aqrar Sığorta Müştərək Sığorta Şirkəti" ASC, Dövlət Sığorta Kommersiya Şirkəti (“Azərsığorta”), eləcə də “Xalq Həyat Sığorta” və “Xalq Sığorta” ASC-lərdir.

Qalan 15 şirkət isə müxtəlif məbləğlərdə mənfəət vergisi ödəyib. Onlardan 4-də sözügedən göstərici 1 milyon manatdan çoxdur. Həmin sığorta şirkətləri “PAŞA Sığorta” (8,564 milyon manat), “PAŞA Həyat Sığorta” (7,706 milyon manat), “Meqa Sığorta” (1,432 milyon manat) və “Atəşgah Həyat Sığorta” (1,246 milyon manat) ASC-lərdir.

Qalan 11 sığorta şirkətindən 9-nun mənfəət vergisi ödəmələri 100 min manat - 1 milyon manat arasında, 2 şirkətin mənfəət vergisi ödəmələri isə 100 min manatdan azdır.

Renkinq.az