Kəmalə Alıyeva
Çin alimləri laboratoriyada mutant Ebola virusu yaradaraq son dərəcə qorxulu və ölümcül təcrübə aparıblar.
İndex.az xəbər verir ki, bu təcrübə əvvəlcə Ebola virusunu daha təhlükəsiz mühitdə öyrənmək üçün nəzərdə tutulmuşdu. Alimlər təhlükəsiz mühitdə xəstəliyin əlamətlərini təqlid edə bilən heyvan modelləri tapmaq istəyirlər.
Lakin bu dəfə təcrübə nəticəsində ortaya çıxan virus kifayət qədər ölümcül olub. O, həmçinin bir növ göz axıntısı və çoxlu orqan çatışmazlığı da daxil olmaqla, olduqca pis simptomlar göstərdi.
Hebei Tibb Universitetinin tədqiqatçıları bu mutant virusu yaratmaq üçün zülal əlavə edərək virusun insan orqanizmindəki hüceyrələrə yayılmasına şərait yaradıblar. Yoluxmuş hamsterlər Ebola xəstələrində müşahidə olunanlara bənzər simptomlar göstərdilər. Ən maraqlı və bəlkə də qorxulu simptomlardan biri yoluxmuş hamsterlərin gözlərində əmələ gələn ifrazatlar idi.
Bu ifrazatlar hamsterlərin görmə qabiliyyətinə təsir edərək, onların göz almalarının səthində qabıqların əmələ gəlməsinə səbəb olur. Bu tədqiqat təhlükəsiz laboratoriya mühitində Ebola simptomlarını təqlid edə biləcək bir model tapmaq üçün aparılıb. Alimlər bu eksperimentin Ebola müalicəsi və araşdırması üçün mühüm addım olduğunu bildiriblər. Bununla belə, bu cür təcrübələr ictimai sağlamlıq üçün də bəzi risklər daşıyır. Məsələn, laboratoriya sızması.
Laboratoriya sızmaları çox vaxt qorxulu ssenarilərin mənbəyi kimi görülür. Əgər virus laboratoriya mühitindən qaçıb ictimaiyyətə yayılarsa, bu, böyük bir sağlamlıq böhranı yarada bilər. Bu riskləri minimuma endirmək üçün belə təcrübələrin təhlükəsiz aparılması çox vacibdir.