Kəmalə Alıyeva
“Brend Finance” beynəlxalq marka qiymətləndirmə təşkilatının hesabatından tərtib edilən məlumata görə, 2024-cü il Paris Olimpiya Oyunlarının brend dəyəri 11,4 milyard dollara çatıb.
İndex.az xəbər verir ki, COVİD-19 epidemiyasının kölgəsində keçirilən 2021-ci il Tokio Olimpiya Oyunlarının dəyəri 8,3 milyard dollar səviyyəsində olub.
Beləliklə, Paris Olimpiadasının brend dəyəri Tokiodakı təşkilatla müqayisədə 37,3% artıb.
Paris Olimpiadasının brend dəyərinin təqribən 4,3 milyard dolları milli olimpiya komitələrinin, 7,1 milyard dolları isə Beynəlxalq Olimpiya Komitəsinin (BOK) payına düşür. Nəşriyyat hüquqları və sponsorluqlar brend dəyərinə ən çox töhfə verən gəlir mənbələri arasındadır. Bilet gəlirləri ən az gəlir gətirən sahə kimi önə çıxır. Burada təşkilatçıların əsas strategiyası mənfəətdən çox əlçatanlıq kimi önə çıxır.
Olimpiya Komitəsinin verdiyi rəsmi açıqlamada bu sahədə rekordun Parisdə 9,53 milyon biletlə yeniləndiyi vurğulanıb. 1996-cı ildə ABŞ-ın Atlanta şəhərində keçirilən oyunlara 8,3 milyon bilet satıldığı halda, bu rekord 28 ildən sonra Parisdə 9 milyondan çox biletlə yenilənib. 2028-ci ildə ABŞ-da keçiriləcək Los-Anceles Olimpiya Oyunlarında əlavə gəlir, sponsorluq və brend dəyəri rekordlarının qırılacağı da ehtimal edilir.