Kəmalə Alıyeva
Kino tarixinin ən ikonik avtomobillərindən biri olan Ceyms Bondun “Aston Martin DB5” modeli 25 il ərzində müəmmalı şəkildə yoxa çıxdıqdan sonra nəhayət tapılıb. Maşının yeri eşidənləri şoka salıb.
İndex.az xəbər verir ki, “Aston Martin DB5” 1997-ci ildə Floridada bir anbardan müəmmalı şəkildə yoxa çıxdı və o vaxtdan bəri izi tapılmadı.
Avtomobilin hekayəsi demək olar ki, Bond filmi qədər mürəkkəb və hərəkətlərlə doludur. “Aston Martin DB5″də orijinal filmlərdə istifadə olunan bir sıra xüsusi avadanlıqlar var idi: katapult oturacağı, pulemyotlar, təkər kəsiciləri və daha çox Bond tipli qadcetlərlə təchiz edilmişdi.
Filmlərdən sonra avtomobildə bütün bu xüsusi avadanlıqlar çıxarılaraq standartlaşdırılıb. Bununla belə, Bond fanat kolleksiyaçısı Gavin Keyzar bu avtomobili aldıqdan sonra bütün avadanlıqları geri əlavə etdi. Daha sonra avtomobil bir neçə dəfə əl dəyişdirdi və 1997-ci ildə yoxa çıxdı.
Detektiv hekayələrə mövzu ola biləcək illərlə aparılan axtarış və araşdırmalar nəticəsində “Art Recovery İnternational” tərəfindən Yaxın Şərqdə xüsusi bir mülkdə tapılıb. Avtomobilin indiki sahibinin bu tarixi avtomobilin oğurlandığından belə xəbəri olmayıb.
İndi “Aston Martin DB5” yenidən diqqət mərkəzindədir və onun dəyəri təxminən 25 milyon dollar qiymətləndirilir. Bu qiymətlə avtomobil təkcə Bond həvəskarları üçün deyil, həm də bütün klassik avtomobil kolleksiyaçıları üçün əvəzolunmaz xəzinədir.
Ceyms Bondun “Aston Martin” DB5 modeli təkcə Bond həvəskarlarını deyil, həm də kino və avtomobil dünyasını həyəcanlandırdı. “Art Recovery International” hazırkı sahibindən ikonik avtomobili geri qaytarmağı tələb etdi və qanuni tədbirlər görmək hüququnu özündə saxladığını bildirdi.