Index
Azərbaycanın boya istehsalçısı olan şirkət məhsullarını Küveytə və digər ərəb ölkələrinə ixrac edəcək.
İndex.az xəbər verir ki, bunu “Azərbaycan iqtisadiyyatı” Teleqram kanalına “NB Holdinq” ASC-nin Marketinq departamentinin direktoru Mahir Quliyev deyib.
Onun sözlərinə görə, həmin ölkələrə “CORELLA” brendi altında istehsal etdikləri boyaları göndərəcəklər, artıq bunun üçün müəyyən müqavilələr bağlanılıb. İxraca bu ilin sentyabr ayından başlamaq nəzərdə tutulur. Bununla yanaşı, şirkət Qazaxıstan, Özbəkistan və Türkmənistan bazarına daxil olmaq niyyətindədir: “Artıq bir neçə ildir ki, Qazaxıstan və Özbəkistan bazarını araşdırırıq. Bu ölkələrin tikinti potensialı böyükdür. Orada bizim məhsulların satışı üçün geniş imkanlar var. Biz də bu imkanları dəyərləndiririk”.
M.Quliyev əlavə edib ki, “AZPOL” və “CORELLA” brendi altında istehsal etdikləri məhsulları artıq Rusiya və Gürcüstana ixrac ediblər. Şirkət inşaat, dekorativ, sənaye, yol cizgi boyaları, quru inşaat qarışıqları, izolyasiya materialları, təmizləyici və yuyucu vasitələr, boyalar üçün dəmir və plastik qablar, yuyucu vasitələr üçün plastik qablar və s. istehsal edir: “Biz istənilən həcmdə məhsul istehsal etməyə, hətta başqa şirkətlərin də sifarişlərini həyata keçirməyə qadirik. Qablaşdırma üçün 200 qramdan 25-50 kq-a qədər olan qablar istehsal edirik”.