Kəmalə Alıyeva
“Apple” məhsullarına böyük tələbat olduğu üçün bir çox saxta cihazlar, xüsusən də “iPhone” istehsal olunur. Bu il “iPhone 15” ilə şirkət telefonun orijinallığını sübut etmək və kənar “iPhone” alarkən insanların aldadılması riskini azaltmaq üçün məhsul qutusuna yeni təhlükəsizlik mexanizmi əlavə etdi.
İndex.az xəbər verir ki, bu yaxınlarda satışa çıxarılan “iPhone 15” və “iPhone 15 Pro” qutularında yalnız ultrabənövşəyi işıq altında görünən su nişanı və QR kodu var. Bununla da müştərilər alacaqları cihazın orijinal olub-olmadığını anlaya bilərlər. Əslində, bunu başa düşə bildiklərini söyləmək daha doğru ola bilər, çünki çinlilər də saxtalaşdırmağı öyrəniblər.
Çindəki əlaltı fabriklər artıq “iPhone 15” qutuları üçün yeni təhlükəsizlik mexanizmi ilə saxta etiketlər istehsal etməyə başlayıblar. Dərc edilmiş şəkillər orijinal qablaşdırmada tapılan yırtıla bilən möhürlərin uğurla kopyalandığını göstərir.
Sözügedən etiketlərdə model adı və “Data Matrix” kodunu ehtiva edən gizli nişanı var. Fırıldaqçıların bu etiketləri saxtalaşdırması cəmi bir həftə çəkdi. Buna görə də istehlakçılar indi rəsmi kanallardan kənar “iPhone 15” alarkən daha diqqətli olmalı və saxta olub-olmadığını öyrənmək üçün məhsulu hərtərəfli nəzərdən keçirməli olacaqlar.
