Əfqanıstandakı Taliban hökuməti bir neçə dağlıq ərazidə Pakistan əsgərlərinə hücum etdiyini açıqlayıb.

İndex.az xəbər verir ki, Taliban sözçüsü bildirib ki, “qisas əməliyyatı” adlandırdıqları əməliyyatda 58 pakistanlı hərbçi öldürülüb. O, Pakistanın Əfqanıstanın hava məkanını pozduğunu və cümə axşamı bazar yerini bombaladığını iddia edib.

Pakistan bu iddianı rədd edərək, silahlı qüvvələrinin 58 deyil, 23 üzvünün öldürüldüyünü və 200 Taliban və ona bağlı terrorçunun zərərsizləşdirildiyini iddia edib.

Pakistanın daxili işlər naziri Möhsün Naqvi deyib ki, Əfqanıstan hücumları “səbəbsiz” olub və mülki şəxslər atəşə tutulub. Naqvi xəbərdarlıq edib ki, hərbçilər Əfqanıstandan istənilən hücuma cavab verəcəklər.

İslamabad Kabili öz ərazisində Pakistanı hədəf alan terrorçulara sığınacaq verməkdə ittiham edir, Taliban hökuməti bu iddianı rədd edir.

BBC-nin əldə etdiyi məlumata görə, həm Əfqanıstan, həm də Pakistan tərəfləri Kunar-Kurram bölgəsində atıcı silahlardan və artilleriyadan istifadə ediblər.

Oktyabrın 12-də mətbuat konfransında çıxış edən Taliban sözçüsü Zabihullah Mücahid bildirib ki, 58 pakistanlı əsgərin ölümündən əlavə, təxminən 30 nəfər yaralanıb. O, əlavə edib ki, 9 Taliban döyüşçüsü öldürülüb, 16-18 nəfər yaralanıb.

Pakistan Silahlı Qüvvələri 29 əsgərinin yaralandığını, yüzlərlə Taliban döyüşçüsünün yaralandığını açıqlayıb.

Taliban hökumətinin xarici işlər naziri Hindistanın paytaxtı Yeni Dehlidə keçirdiyi mətbuat konfransında deyib: "Pakistan xalqı və hökuməti ilə heç bir problemimiz yoxdur. Pakistanda vəziyyəti pozmağa çalışan müəyyən qruplar var. Əfqanıstanın öz ərazisini və sərhədlərini qorumaq hüququ var və buna görə də bu pozuntuya cavab verib".